ham ne tirii khaatir se dil e zaar bhi chhodaa

Ham ne tiree khaatir se dil-e-zaar bhee chhoDaa Too bhee na huaa yaar aur ik yaar bhee chhoDaa Kya hogaa rafoogar se rafoo meraa garebaan Ai dast-e-junoon too ne naheen taar bhee chhoDaa Diin de ke gaya kufr ke bhee kaam se aashiq Tasbeeh ke saath us ne to zunnaar bhee chhoDaa Goshe men tiree chashm-e-siyah-mast ke dil ne Kee jab se jagah khaana-e-khummaar bhee chhoDaa Is se hai ghareebon ko tasallee ki ajal ne Muflis ko jo maaraa to na zardaar bhee chhoDaa TeDhe na ho ham se rakho ikhlaas to seedhaa Tum pyaar se rukte ho to lo pyaar bhee chhoDaa Kya chhoDen aseeraan-e-mohabbat ko wo jis ne Sadqe men na ik murgh-e-giraftaar bhee chhoDaa Pahunchee miree rusvaa.ee kee kyoonkar khabar us ko Us shokh ne to dekhnaa akhbaar bhee chhoDaa Kartaa thaa jo yaan aane kaa jhooTaa kabhee iqraar Muddat se 'zafar' us ne wo iqraar bhee chhoDaa