havaa men phirte ho kya hirs aur havaa ke liye
— Bahadur Shah Zafar
Havaa men phirte ho kya hirs aur havaa ke liye
Ghuroor chhoD do ai ghaafilo khuda ke liye
Giraa diyaa hai hamen kis ne chaah-e-ulfat men
Ham aap Duube kisee apne aashnaa ke liye
Jahaan men chaahiye aivaan o qasr shaahon ko
Ye ek gumbad-e-gardoon hai bas gadaa ke liye
Wo aa.eena hai ki jis ko hai haajat-e-seemaab
Ik iztiraab hai kaafee dil-e-safaa ke liye
Tapish se dil kaa ho kya jaane siine men kya haal
Jo tere tiir kaa rauzan na ho havaa ke liye
Tabeeb-e-ishq kee dukkaan men DhoonDte phirte
Ye dardmand-e-mohabbat tiree davaa ke liye
Jo haath aa.e 'zafar' khaak-paa-e-'fakhruddeen'
To main rakhoon use aankhon ke tootiyaa ke liye