ishq to mushkil hai ai dil kaun kahtaa sahl hai

Ishq to mushkil hai ai dil kaun kahtaa sahl hai Lek naadaanee se apnee too ne samjhaa sahl hai Gar khule dil kee girah tujh se to ham jaanen tujhe Ai sabaa ghunche kaa uqda khol denaa sahl hai Hamdamo dil ke lagaane men kaho lagtaa hai kya Par chhuDaanaa is kaa mushkil hai lagaanaa sahl hai Garche mushkil hai bahut meraa ilaaj-e-dard-e-dil Par jo too chaahe to ai rashk-e-maseehaa sahl hai Hai bahut dushvaar marnaa ye sunaa karte the ham Par judaa.ee men tiree ham ne jo dekhaa sahl hai Sham.a ne jal kar jalaayaa bazm men parvaane ko Bin jale apne jalaanaa kya kisee kaa sahl hai Ishq kaa rasta saraasar hai dam-e-shamsheer par Bul-havas is raah men rakhnaa qadam kya sahl hai Ai 'zafar' Kuch ho sake to fikr kar uqbaa kaa too Kar na Dunya kaa taraddud kaar-e-Dunya sahl hai