itnaa na apne jaame se baahar nikal ke chal
— Bahadur Shah Zafar
Itnaa na apne jaame se baahar nikal ke chal
Dunya hai chal-chalaav kaa rasta sambhal ke chal
Kam-zarf pur-ghuroor zaraa apna zarf dekh
Maanind josh-e-gham na ziyaada ubal ke chal
Fursat hai ik sadaa kee yahaan soz-e-dil ke saath
Us par sapand-vaar na itnaa uchhal ke chal
Ye ghol-vash hain in ko samajh too na rahnumaa
Saa.e se bach ke ahl-e-fareb-o-daghal ke chal
Auron ke bal pe bal na kar itnaa na chal nikal
Bal hai to bal ke bal pe too Kuch apne bal ke chal
Insaan ko kal kaa putlaa banaayaa hai us ne aap
Aur aap hee wo kahtaa hai putle ko kal ke chal
Phir aankhen bhee to diin hain ki rakh dekh kar qadam
Kahtaa hai kaun tujh ko na chal chal sambhal ke chal
Hai turfa amn-gaah nihaan-khaana-e-adam
Aankhon ke roo-ba-roo se too logon ke Tal ke chal
Kya chal sakegaa ham se ki pahchaante hain ham
Too laakh apnee chaal ko zaalim badal ke chal
Hai sham.a sar ke bal jo mohabbat men garm ho
Parvaana apne dil se ye kahtaa hai jal ke chal
Bulbul ke hosh nik.hat-e-gul kee tarah uDaa
Gulshan men mere saath zaraa itr mal ke chal
Gar qasd soo-e-dil hai tiraa ai nigaah-e-yaar
Do-chaar tiir paik se aage ajal ke chal
Jo imtihaan-e-tab.a kare apna ai 'zafar'
To kah do us ko taur pe too is ghazal ke chal