jab ki pahluu men hamaare but e khud kaam na ho

Jab ki pahloo men hamaare but-e-khud-kaam na ho Girye se shaam-o-sahar kyuun ki hamen kaam na ho Le gaya dil kaa jo aaraam hamaare yaa rab Us dil-aaraam ko mutlaq kabhee aaraam na ho Jis ko samjhe lab-e-paan-khurda wo maalida-misee Mardumaan dekhiyo phoolee wo kaheen shaam na ho Aaj tashreef gulistaan men wo mai-kash laayaa Kaf-e-nargis pe dharaa kyoonki bhalaa jaam na ho Kar mujhe qatl vahaan ab ki na ho koee jahaan Taa miree jaan too kaheen khalq men badnaam na ho Dekh kar kholiyo too kaakul-e-pechaan kee girah Ki miraa taa.ir-e-dil us ke tah-e-daam na ho Bin tire ai but-e-khud-kaam ye dil ko hai khatar Tere aashiq kaa tamaam aah kaheen kaam na ho Aaj har ek jo yaaro nazar aataa hai niDhaal Apnee abroo kee wo kheenche hue samsaam na ho Hai mire shokh kee baaleeda wo kaafir aankhen Jis ke ham chashm zaraa nargis-e-baadaam na ho Sub.h hotee hee naheen aur naheen kaTtee raat Rukh pe khole wo kaheen zulf-e-siyaah-faam na ho Ai 'zafar' charkh pe khursheed jo yuun kaanpe hai Jalva-gar aaj kaheen yaar lab-e-baam na ho