kaafir tujhe allaah ne suurat to parii dii

Kaafir tujhe allaah ne soorat to paree dee Par haif tire dil men mohabbat na zaree dee Dee too ne mujhe saltanat-e-bahr-o-bar ai ishq HonTon ko jo khushkee miree aankhon ko taree dee Khaal-e-lab-e-sheereen kaa diyaa bosa kab us ne Ik chaaT lagaane ko mire neeshkaree dee Kaafir tire sauda-e-sar-e-zulf ne mujh ko Kya kya na pareshaanee o aashufta-saree dee Mehnat se hai azmat ki zamaane men nageen ko Be-kaavish-e-seena na kabhee naamvaree dee Sayyaad ne dee rukhsat-e-parvaaz par afsos Too ne na ijaazat mujhe be-baal-o-paree dee Kahtaa tiraa Kuch sokhta-jaan lek ajal ne Fursat na use misl-e-charaagh-e-saharee dee Qassam-e-azal ne na rakhaa ham ko bhee mahroom Garche na diyaa koee hunar be-hunaree dee Us chashm men hai surme kaa dumbaala pur-aashob Kyuun haath men badmast ke bandooq bharee dee Dil de ke kiyaa ham ne tiree zulf kaa sauda Ik aap balaa apne liye mol khareedee Saaqee ne diyaa kya mujhe ik saaghar-e-sarshaar Goyaa ki do aalam se 'zafar' be-khabaree dee