karenge qasd ham jis dam tumhaare ghar men aavenge
— Bahadur Shah Zafar
Karenge qasd ham jis dam tumhaare ghar men aavenge
Jo hogee umr bhar kee raah to dam bhar men aavenge
Agar haathon se us sheereen-adaa ke zab.h honge ham
To sharbat ke se ghoonT aab-e-dam-e-khanjar men aavenge
Yahee gar josh-e-girya hai to bah kar saath ashkon ke
Hazaaron paara-e-dil mere chashm-e-tar men aavenge
Gar is qaid-e-balaa se ab kee chhooTenge to phir hargiz
Na ham daam-e-fareb-e-shokh-e-ghaarat-gar men aavenge
Na jaate garche mar jaate jo ham maaloom kar jaate
Ki itnaa tang jaa kar koocha-e-dilbar men aavenge
Garebaan-chaak laakhon haath se us mehr-e-tal.at ke
Ba-rang-e-sub.h-e-mahshar arsa-e-mahshar men aavenge
Jo sargardaanee apnee tere deevaane dikhaa.enge
To phir kya kya bagoole dasht ke chakkar men aavenge
'zafar' apna karishma gar dikhaayaa chashm-e-saaqee ne
Tamaashe jaam-e-jam ke sab nazar saaghar men aavenge