khvaah kar insaaf zaalim khvaah kar bedaad tuu

Khvaah kar insaaf zaalim khvaah kar bedaad too Par jo fariyaadee hain un kee sun to le fariyaad too Dam-ba-dam bharte hain ham teree havaa-khvaahee kaa dam Kar na bad-khooon ke kahne se hamen barbaad too Kya gunah kya jurm kya taqseer meree kya khataa Ban gaya jo is tarah haq men mire jallaad too Qaid se teree kahaan jaa.enge ham be-baal-o-par Kyuun qafas men tang kartaa hai hamen sayyaad too Dil ko dil se raah hai to jis tarah se ham tujhe Yaad karte hain kare yuun hee hamen bhee yaad too Dil tiraa faulaad ho to aap ho aa.eena-vaar Saaf yak-baaree sune meree agar roodaad too Shaad o khurram ek aalam ko kiyaa us ne 'zafar' Par sabab kya hai ki hai ranjeeda o naashaad too