kya kahuun dil maail e zulf e dotaa kyuunkar huaa

Kya kahoon dil maa.il-e-zulf-e-dotaa kyoonkar huaa Ye bhalaa changaa giraftaar-e-balaa kyoonkar huaa Jin ko mehraab-e-ibaadat ho kham-e-abroo-e-yaar Un kaa kaabe men kaho sajda adaa kyoonkar huaa Deeda-e-hairaan hamaaraa thaa tumhaare zer-e-paa Ham ko hairat hai ki paidaa naqsh-e-paa kyoonkar huaa Naama-bar khat de ke us nau-khat ko too ne kya kahaa Kya khataa tujh se huee aur wo khafaa kyoonkar huaa Khaaksaaree kya ajab khove agar dil kaa ghubaar Khaak se dekho ki aa.eena safaa kyoonkar huaa Jin ko yaktaa.ee kaa da.avaa thaa wo misl-e-aa.eena Un ko hairat hai ki paidaa doosraa kyoonkar huaa Tere daanton ke tasavvur se na thaa gar aab-daar Jo bahaa aansoo wo durr-e-be-bahaa kyoonkar huaa Jo na honaa thaa huaa ham par tumhaare ishq men Tum ne itnaa bhee na poochhaa kya huaa kyoonkar huaa Wo to hai naa-aashnaa mash.hoor aalam men 'zafar' Par khuda jaane wo tujh se aashnaa kyoonkar huaa