kyuunki ham Dunya men aae Kuch sabab khultaa nahin
— Bahadur Shah Zafar
Kyoonki ham Dunya men aa.e Kuch sabab khultaa naheen
Ik sabab kya bhed vaan kaa sab kaa sab khultaa naheen
Poochhtaa hai haal bhee gar wo to maare sharm ke
Ghuncha-e-tasveer ke maanind lab khultaa naheen
Shaahid-e-maqsood tak pahunchenge kyoonkar dekhiye
Band hai baab-e-tamannaa hai ghazab khultaa naheen
Band hai jis khaana-e-zindaan men deevaana teraa
Us kaa darvaaza paree-roo roz o shab khultaa naheen
Dil hai ye ghuncha naheen hai is kaa uqda ai sabaa
Kholne kaa jab talak aave na Dhab khultaa naheen
Ishq ne jin ko kiyaa khaatir-girafta un kaa dil
Laakh hove garche saamaan-e-tarab khultaa naheen
Kis tarah maaloom hove us ke dil kaa mudda.aa
Mujh se baaton men 'zafar' wo ghuncha-lab khultaa naheen