main hoon aasii ki pur khataa Kuch hoon
— Bahadur Shah Zafar
Main hoon aasee ki pur-khataa Kuch hoon
Teraa banda hoon ai khuda Kuch hoon
Juzv o kul ko naheen samajhtaa main
Dil men thoDaa saa jaantaa Kuch hoon
Tujh se ulfat nibaahtaa hoon main
Baa-wafa hoon ki bevafaa Kuch hoon
Jab se naa-aashnaa hoon main sab se
Tab kaheen us se aashnaa Kuch hoon
Nashsha-e-ishq le uDaa hai mujhe
Ab maze men uDaa raha Kuch hoon
Khvaab meraa hai ain bedaaree
Main to us men bhee dekhtaa Kuch hoon
Garche Kuch bhee naheen hoon main lekin
Us pe bhee Kuch na poochho kya Kuch hoon
Samjhe wo apna khaaksaar mujhe
Khaak-e-rah hoon ki khaak-e-paa Kuch hoon
Chashm-e-altaaf fakhr-e-deen se hoon
Ai 'zafar' Kuch se ho gaya Kuch hoon