mar gae ai vaah un ki naaz bardaarii men ham

Mar ga.e ai vaah un kee naaz-bardaaree men ham Dil ke haathon se paDe kaisee giraftaaree men ham Sab pe raushan hai hamaaree sozish-e-dil bazm men Sham.a saan jalte hain apnee garm-baazaaree men ham Yaad men hai tere dam kee aamad-o-shud pur-khayaal Be-khabar sab se hain is dam kee khabardaaree men ham Jab hansaayaa gardish-e-gardoon ne ham ko shakl-e-gul Misl-e-shabnam hain hamesha girya o zaaree men ham Chashm o dil biinaa hai apne roz o shab ai mardumaan Garche sote hain ba-zaahir par hain bedaaree men ham Dosh par rakht-e-safar baandhe hai kya ghuncha sabaa Dekhte hain sab ko yaan jaise ki tayyaaree men ham Kab talak be-deed se yaa rab rakhen chashm-e-wafa Lag rahe hain aaj kal to dil kee gham-khvaaree men ham Dekh kar aa.eena kya kahtaa hai yaaro ab wo shokh Maah se sad chand behtar hain adaa-daaree men ham Ai 'zafar' likh too ghazal bahr o qavaafee pher kar Khaama-e-dur-rez se hain ab guhar-baaree men ham