mohabbat chaahiye baaham hamen bhi ho tumhen bhi ho

Mohabbat chaahiye baaham hamen bhee ho tumhen bhee ho Khushee ho is men yaa ho gham hamen bhee ho tumhen bhee ho Ghaneemat tum ise samjho ki is khum-khaane men yaaro Naseeb ik-dam dil-e-khurram hamen bhee ho tumhen bhee ho Dilaao hazrat-e-dil tum na yaad-e-khatt-e-sabz us kaa Kaheen aisa na ho ye sam hamen bhee ho tumhen bhee ho Hamesha chaahtaa hai dil ki mil kar kiije mai-noshee Muyassar jaam-e-mai jam-jam hamen bhee ho tumhen bhee ho Ham apna 'ishq chamkaa.en tum apna husn chamkaao Ki hairaan dekh kar 'aalam hamen bhee ho tumhen bhee ho Rahe hirs-o-havaa daa.im 'azeezo saath jab apne Na kyoonkar fikr-e-besh-o-kam hamen bhee ho tumhen bhee ho 'zafar' se kahtaa hai majnoon kaheen dard-e-dil-e-mahzoon Jo gham se fursat ab ik dam hamen bhee ho tumhen bhee ho