nasiib vasl tumhaaraa kaho to kyuun kar ho
— Bahadur Shah Zafar
Naseeb vasl tumhaaraa kaho to kyoon-kar ho
Firaaq-e-yaar men taskeen ho to kyoon-kar ho
Too apne vaa'de kaa sachchaa jo ho to kyoon-kar ho
Ye tujh se jhuuT kee ho tark khoo to kyoon-kar ho
Na jal ke khaak ho jab tak ki misl-e-parvaana
Ho taish dil kaa hamaare faro to kyoon-kar ho
Tire mareez ke gur sau 'ilaaj hon lekin
Shifaa na us ke naseebon men ho to kyoon-kar ho
Kisee pe raaz-e-nihaan dil kaa tere ai aankho
Jo tum na girya se afshaa karo to kyoon-kar ho
Ye ham bhee chaahte hain tark-e-'ishq ho lekin
Jo dil pe bas na ho ai naaseho to kyoon-kar ho
Milen na khaak men jab tak tumhaare kushta-e-naaz
Dameeda khaak se ho naaz-e-boo to kyoon-kar ho
Jigar pe zakhm to khaa.e magar mazaa haasil
Namak-fishaan ho na wo jang-joo to kyoon-kar ho
Karam kahaan ke sitam bhee ho karte naaz se tum
Jo ye bhee ho to ghaneemat hai wo to kyoon-kar ho
'zafar' jo ho na mohabbat men dil se dil ko raah
Wo mere haal se aagaah ho to kyoon-kar ho