rukh jo zer e sumbul e pur pech o taab aa jaaegaa

Rukh jo zer-e-sumbul-e-pur-pech-o-taab aa jaa.egaa Phir ke burj-e-sumbule men aaftaab aa jaa.egaa Teraa ehsaan hogaa qaasid gar shitaab aa jaa.egaa Sabr mujh ko dekh kar khat kaa javaab aa jaa.egaa Ho na betaab itnaa gar us kaa itaab aa jaa.egaa Too ghazab men ai dil-e-khaana-kharaab aa jaa.egaa Is qadar ronaa naheen behtar bas ab ashkon ko rok Varna toofaan dekh ai chashm-e-pur-aab aa jaa.egaa Pesh hovegaa agar tere gunaahon kaa hisaab Tang zaalim arsa-e-roz-e-hisaab aa jaa.egaa Dekh kar dast-e-sitam men teree tegh-e-aabdaar Mere har zakhm-e-jigar ke munh men aab aa jaa.egaa Apnee chashm-e-mast kee gardish na ai saaqee dikhaa Dekh chakkar men abhee jaam-e-sharaab aa jaa.egaa Khuub hogaa haan jo siine se nikal jaa.egaa too Chain mujh ko ai dil-e-pur-iztiraab aa jaa.egaa Ai 'zafar' uTh jaa.egaa jab parda-e-sharm-o-hijaab Saamne wo yaar mere be-hijaab aa jaa.egaa