shaane ki har zabaan se sune koi laaf e zulf

Shaane kee har zabaan se sune koi laaf-e-zulf Cheere hai siina raat ko ye moo-shigaaf-e-zulf Jis tarah se ki kaabe pe hai poshish-e-siyaah Is tarah is sanam ke hai rukh par ghilaaf-e-zulf Barham hai is qadar jo mire dil se zulf-e-yaar Shaamat-zada ne kya kiyaa aisa khilaaf-e-zulf Matlab na kufr o diin se na dair o haram se kaam Kartaa hai dil tavaaf-e-izaar o tavaaf-e-zulf Naaf-e-ghazaal-e-cheen hai ki hai naafa-e-tataar Kyoonkar kahoon ki hai girah-e-zulf naaf-e-zulf Aapas men aaj dast-o-garebaan hai roz o shab Ai mehr-vash zaree kaa nahin moo-e-baaf-e-zulf Kahtaa hai koi jiim koi laam zulf ko Kahtaa hoon main 'zafar' ki musattah hai kaaf-e-zulf