tukde nahin hain aansuon men dil ke chaar paanch
— Bahadur Shah Zafar
TukDe nahin hain aansuon men dil ke chaar paanch
Surkhaab baiThe paanee men hain mil ke chaar paanch
Munh khole hain ye zakhm jo bismil ke chaar paanch
Phir lenge bose khanjar-e-qaatil ke chaar paanch
Kahne hain matlab un se hamen dil ke chaar paanch
Kya kahiye ek munh hain vahaan mil ke chaar paanch
Dariya men gir paDaa jo miraa ashk ek garm
But-khaane lab pe ho ga.e saahil ke chaar paanch
Do-chaar laashe ab bhee paDe tere dar pe hain
Aur aage dab chuke hain tale gil ke chaar paanch
Raahen hain do majaaz o haqeeqat hai jin kaa naam
Raste nahin hain ishq kee manzil ke chaar paanch
Ranj o ta'ab museebat o gham yaas o dard o daagh
Aah o fughaan rafeeq hain ye dil ke chaar paanch
Do tiin jhaTke duun juun hee vahshat ke zor men
Zindaan men TukDe hoven salaasil ke chaar paanch
Farhaad o qais o vaamiq o azraa the chaar dost
Ab ham bhee aa mile to hue mil ke chaar paanch
Naaz o adaa o ghamza nigah panja-e-mizha
Maaren hain ek dil ko ye pil pil ke chaar paanch
Iimaa hai ye ki devenge nau din ke baa'd dil
Likh bheje khat men sher jo be-dil ke chaar paanch
Hiire ke nau-ratan nahin tere hue hain jam'
Ye chaandnee ke phuul magar khil ke chaar paanch
Meenaa-e-nuh-falak hai kahaan baada-e-nashaat
Sheeshe hain ye to zahr-e-halaahal ke chaar paanch
Naakhun karen hain zakhmon ko do do milaa ke ek
The aaTh das so ho ga.e ab chhil ke chaar paanch
Gar anjum-e-falak se bhee taadaad keejiye
Niklen ziyaada daagh mire dil ke chaar paanch
Maaren jo sar pe sil ko uThaa kar qalaq se ham
Das paanch TukDe sar ke hon aur sil ke chaar paanch
Maan ai 'zafar' too panj-tan o chaar-yaar ko
Hain sadr-e-deen kee yahee mahfil ke chaar paanch