vaaqif hain ham ki hazrat e gam aise shakhs hain
— Bahadur Shah Zafar
Vaaqif hain ham ki hazrat-e-gham aise shakhs hain
Aur phir ham un ke yaar hain ham aise shakhs hain
Deevaane tere dasht men rakkhenge jab qadam
Majnoon bhee legaa un ke qadam aise shakhs hain
Jin pe hon aise zulm o sitam ham naheen wo log
Hon roz balki lutf o karam aise shakhs hain
Yuun to bahut hain aur bhee khoobaan-e-dil-fareb
Par jaise pur-fan aap hain kam aise shakhs hain
Kya kya jafaa-kashon pe hain un dilbaron ke zulm
Aison ke sahte aise sitam aise shakhs hain
Diin kya hai balki deejiye eemaan bhee unhen
Zaahid ye but khuda kee qasam aise shakhs hain
Aazurda hoon adoo ke jo kahne pe ai 'zafar'
Ne aise shakhs wo hain na ham aise shakhs hain