wo sau sau atkhaton se ghar se baahar do qadam nikle
— Bahadur Shah Zafar
Wo sau sau aTkhaTon se ghar se baahar do qadam nikle
Balaa se us kee gar us men kisee muztar kaa dam nikle
Kahaan aansoo ke qatre khoon-e-dil se hain baham nikle
Ye dil men jam.a the muddat se Kuch paikaan-e-gham nikle
Mire mazmoon-e-soz-e-dil se khat sab jal gaya meraa
Qalam se harf jo nikle sharar hee yak-qalam nikle
Nikaal ai chaaragar too shauq se lekin sar-e-paikaan
Udhar nikle jigar se tiir udhar qaalib se dam nikle
Tasavvur se lab-e-la.aleen ke tere ham agar ro den
To jo lakht-e-jigar aankhon se nikle ik raqam nikle
Nahin Darte agar hon laakh zindaan yaar zindaan se
Junoon ab to misaal-e-naala-e-zanjeer ham nikle
Jigar par daagh lab par dood-e-dil aur ashk daaman men
Tiree mahfil se ham maanind-e-sham.a sub.h-dam nikle
Agar hota zamaana gesoo-e-shab-rang kaa tere
Miree shab-deez sauda kaa ziyaada-tar qadam nikle
Kajee jin kee tabee.at men hai kab hotee wo seedhee hai
Kaho shaakh-e-gul-e-tasveer se kis tarah kham nikle
Shumaar ik shab kiyaa ham ne jo apne dil ke daaghon se
To anjum charkh-e-hashtum ke bahut se un se kam nikle
Khuda ke vaaste zaahid uThaa parda na kaabe kaa
Kaheen aisa na ho yaan bhee vahee kaafir-sanam nikle
Tamannaa hai ye dil men jab talak hai dam men dam apne
'zafar' munh se hamaare naam us kaa dam-ba-dam nikle