yaa mujhe afsar e shaahaana banaayaa hota

Yaa mujhe afsar-e-shaahaana banaayaa hota Yaa miraa taaj gadaayaana banaayaa hota Apna deevaana banaayaa mujhe hota too ne Kyuun khirad-mand banaayaa na banaayaa hota Khaaksaaree ke liye garche banaayaa thaa mujhe Kaash khaak-e-dar-e-jaanaana banaayaa hota Nashsha-e-ishq kaa gar zarf diyaa thaa mujh ko Umr kaa tang na paimaana banaayaa hota Dil-e-sad-chaak banaayaa to balaa se lekin Zulf-e-mushkeen kaa tire shaana banaayaa hota Soofiyon ke jo na thaa laa.eq-e-sohbat to mujhe Qaabil-e-jalsa-e-rindaana banaayaa hota Thaa jalaanaa hee agar doori-e-saaqee se mujhe To charaagh-e-dar-e-mai-khaana banaayaa hota Shola-e-husn chaman men na dikhaayaa us ne Varna bulbul ko bhee parvaana banaayaa hota Roz maamoora-e-Dunya men kharaabee hai 'zafar' Aisi bastee ko to veeraana banaayaa hota