kahiin chaand raahon men kho gayaa kahiin chaandnii bhii bhatak gaii
— Bashir Badr
Kaheen chaand raahon men kho gayaa kaheen chaandnee bhee bhaTak ga.ee
Main charaagh vo bhee bujhaa huaa meree raat kaise chamak ga.ee
Miree daastaan kaa uruuj thaa tiree narm palkon kee chhaanv men
Mire saath thaa tujhe jaagnaa tiree aankh kaise jhapak ga.ee
Bhalaa ham mile bhee to kyaa mile vahee dooriyaan vahee faasle
Na kabhee hamaare qadam baDhe na kabhee tumhaaree jhijak ga.ee
Tire haath se mere honT tak vahee intizaar kee pyaas hai
Mire naam kee jo sharaab thee kaheen raaste men chhalak ga.ee
Tujhe bhuul jaane kee koshishen kabhee kaamyaab na ho sakeen
Tiree yaad shaakh-e-gulaab hai jo havaa chalee to lachak ga.ee