mere dil kii raakh kured mat ise muskuraa ke havaa na de
— Bashir Badr
Mire dil kee raakh kured mat ise muskuraa ke havaa na de
Ye charaagh phir bhee charaagh hai kaheen teraa haath jalaa na de
Na.e daur ke na.e khvaab hain na.e mausamon ke gulaab hain
Ye mohabbaton ke charaagh hain inhen nafraton kee havaa na de
Zaraa dekh chaand kee pattiyon ne bikhar bikhar ke tamaam shab
Tiraa naam likkhaa hai ret par koee lahr aa ke miTaa na de
Main udaasiyaan na sajaa sakoon kabhee jism-o-jaan ke mazaar par
Na diye jalen miree aankh men mujhe itnee sakht sazaa na de
Mire saath chalne ke shauq men baDee dhuup sar pe uThaa.egaa
Tiraa naak naqsha hai mom kaa kaheen gham kee aag ghulaa na de
Main ghazal kee shabnamee aankh se ye dukhon ke phuul chunaa karoon
Miree saltanat miraa fan rahe mujhe taaj-o-takht khudaa na de