merii aankhon men tire pyaar kaa aansuu aae

Meree aankhon men tire pyaar kaa aansoo aa.e Koee khushboo main lagaa.oon tiree khushboo aa.e Vaqt-e-rukhsat kaheen taare kaheen jugnoo aa.e Haar pahnaane mujhe phuul se baazoo aa.e Main ne din raat khudaa se ye duaa maangee thee Koee aahaT na ho dar par mire jab too aa.e In dinon aap kaa aalam bhee ajab aalam hai Tiir khaayaa huaa jaise koee aahoo aa.e Us kee baaten ki gul-o-laala pe shabnam barse Sab ko apnaane kaa us shokh ko jaadoo aa.e Us ne chhoo kar mujhe patthar se phir insaan kiyaa Muddaton baa'd miree aankhon men aansoo aa.e