sar se paa tak vo gulaabon kaa shajar lagtaa hai
— Bashir Badr
Sar se paa tak vo gulaabon kaa shajar lagtaa hai
Baa-vazoo ho ke bhee chhoote hue Dar lagtaa hai
Main tire saath sitaaron se guzar saktaa huun
Kitnaa aasaan mohabbat kaa safar lagtaa hai
Mujh men rahtaa hai koee dushman-e-jaanee meraa
Khud se tanhaa.ee men milte hue Dar lagtaa hai
But bhee rakkhe hain namaazen bhee adaa hotee hain
Dil miraa dil naheen allaah kaa ghar lagtaa hai
Zindagee too ne mujhe qabr se kam dee hai zameen
Paanv phailaa.oon to deevaar men sar lagtaa hai