vahii taaj hai vahii takht hai vahii zahr hai vahii jaam hai
— Bashir Badr
Vahee taaj hai vahee takht hai vahee zahr hai vahee jaam hai
Ye vahee khudaa kee zameen hai ye vahee buton kaa nizaam hai
BaDe shauq se miraa ghar jalaa koee aanch tujh pe na aa.egee
Ye zabaan kisee ne khareed lee ye qalam kisee kaa ghulaam hai
Yahaan ek bachche ke khuun se jo likhaa huaa hai use paDhen
Tiraa keertan abhee paap hai abhee meraa sajda haraam hai
Main ye maantaa huun mire diye tiree aandhiyon ne bujhaa diye
Magar ek jugnoo havaaon men abhee raushnee kaa imaam hai
Mire fikr-o-fan tiree anjuman na uruuj thaa na zavaal hai
Mire lab pe teraa hee naam thaa mire lab pe teraa hee naam hai