yuunhii be sabab na phiraa karo koii shaam ghar men rahaa karo

Yoonhee be-sabab na phiraa karo koee shaam ghar men rahaa karo Vo ghazal kee sachchee kitaab hai use chupke chupke paDhaa karo Koee haath bhee na milaa.egaa jo gale miloge tapaak se Ye na.e mizaaj kaa shahr hai zaraa faasle se milaa karo Abhee raah men ka.ee moD hain koee aa.egaa koee jaa.egaa Tumhen jis ne dil se bhulaa diyaa use bhoolne kee duaa karo Mujhe ishtihaar see lagtee hain ye mohabbaton kee kahaaniyaan Jo kahaa naheen vo sunaa karo jo sunaa naheen vo kahaa karo Kabhee husn-e-parda-nasheen bhee ho zaraa aashiqaana libaas men Jo main ban sanvar ke kaheen chaloon mire saath tum bhee chalaa karo Naheen be-hijaab vo chaand saa ki nazar kaa koee asar na ho Use itnee garmee-e-shauq se baDee der tak na takaa karo Ye khizaan kee zard see shaal men jo udaas peD ke paas hai Ye tumhaare ghar kee bahaar hai use aansuon se haraa karo