udaas kaagzii mausam men rang o buu rakh de
— Bekal Utsahi
Udaas kaaghzee mausam men rang o boo rakh de
Har ek phuul ke lab par miraa lahoo rakh de
Zabaan-e-gul se chaTaanen taraashne vaale
Nigaar o naqsh men aasaa.ish-e-numoo rakh de
Sunaa hai ahl-e-khirad phir chaman sajaa.enge
Junoon bhee jeb o garebaan pa-e-rafoo rakh de
Shafaq hai phuul hai deepak hai chaand bhee hai magar
Unheen ke saath kaheen saaghar o suboo rakh de
Chalaa hai jaanib-e-mai-khaana aaj phir vaa.iz
Kaheen na jaam pe lab apne be-vazoo rakh de
Tamaam shahr ko apnee taraf jhukaa loongaa
Gham-e-habeeb mire sar pe haath too rakh de
Giraan lage hai jo ehsaan dast-e-qaatil kaa
UTh aur tegh ke lab par rag-e-guloo rakh de
Khudaa kare miraa munsif sazaa sunaane par
Miraa hee sar mire qaatil ke roo-ba-roo rakh de
Samundaron ne bulaayaa hai tujh ko ai 'bekal'
Too apnee pyaas kee sahraa men aabroo rakh de
Udas kaghzi mausam mein rang o bu rakh de
Har ek phul ke lab par mera lahu rakh de
Zaban-e-gul se chaTanen tarashne wale
Nigar o naqsh mein aasaish-e-numu rakh de
Suna hai ahl-e-KHirad phir chaman sajaenge
Junun bhi jeb o gareban pa-e-rafu rakh de
Shafaq hai phul hai dipak hai chand bhi hai magar
Unhin ke sath kahin saghar o subu rakh de
Chala hai jaanib-e-mai-KHana aaj phir waiz
Kahin na jam pe lab apne be-wazu rakh de
Tamam shahr ko apni taraf jhuka lunga
Gham-e-habib mere sar pe hath tu rakh de
Giran lage hai jo ehsan dast-e-qatil ka
UTh aur tegh ke lab par rag-e-gulu rakh de
KHuda kare mera munsif saza sunane par
Mera hi sar mere qatil ke ru-ba-ru rakh de
Samundaron ne bulaya hai tujh ko ai 'bekal'
Tu apni pyas ki sahra mein aabru rakh de