aarzoo hai wafa kare koi
— Dagh Dehlvi
Aarzoo hai wafa kare koi
Jee na chaahe to kya kare koi
Gar maraz ho davaa kare koi
Marne vaale kaa kya kare koi
Koste hain jale hue kya kya
Apne haq men duaa kare koi
Un se sab apnee apnee kahte hain
Meraa matlab adaa kare koi
Chaah se aap ko to nafrat hai
Mujh ko chaahe khuda kare koi
Us gile ko gila nahin kahte
Gar maze kaa gilaa kare koi
Ye milee daad ranj-e-furqat kee
Aur dil kaa kahaa kare koi
Tum saraapaa ho soorat-e-tasveer
Tum se phir baat kya kare koi
Kahte hain ham nahin khuda-e-kareem
Kyuun hamaaree khataa kare koi
Jis men laakhon baras kee hooren hon
Aisi jannat ko kya kare koi
Is jafaa par tumhen tamannaa hai
Ki miree iltijaa kare koi
Munh lagaate hee 'daagh' itraayaa
Lutf hai phir jafaa kare koi