ajab apna haal hota jo visaal e yaar hota

Ajab apna haal hota jo visaal-e-yaar hota Kabhee jaan sadqe hotee kabhee dil nisaar hota Koee fitna taa-qayaamat na phir aashkaar hota Tire dil pe kaash zaalim mujhe ikhtiyaar hota Jo tumhaaree tarah tum se koee jhooTe va.ade kartaa Tumheen munsifee se kah do tumhen aitbaar hota Gham-e-ishq men mazaa thaa jo use samajh ke khaate Ye wo zahr hai ki aakhir mai-e-khush-gavaar hota Ye maza thaa dil-lagee kaa ki baraabar aag lagtee Na tujhe qaraar hota na mujhe qaraar hota Na mazaa hai dushmanee men na hai lutf dostee men Koee ghair ghair hota koee yaar yaar hota Tire va.ade par sitamgar abhee aur sabr karte Agar apnee zindagee kaa hamen aitbaar hota Ye wo dard-e-dil naheen hai ki ho chaarasaaz koee Agar ek baar miTtaa to hazaar baar hota Ga.e hosh tere zaahid jo wo chashm-e-mast dekhee Mujhe kya ulaT na dete jo na baada-khvaar hota Mujhe maante sab aisa ki adoo bhee sajde karte Dar-e-yaar ka.aba bantaa jo miraa mazaar hota Tumhen naaz ho na kyoonkar ki liyaa hai 'daagh' kaa dil Ye raqam na haath lagtee na ye iftikhaar hota