bhaven tantii hain khanjar haath men hai tan ke baithe hain

Bhaven tantee hain khanjar haath men hai tan ke baiThe hain Kisee se aaj bigDee hai ki wo yuun ban ke baiThe hain Dilon par saikDon sikke tire joban ke baiThe hain Kalejon par hazaaron tiir is chitvan ke baiThe hain Ilaahee kyuun naheen uThtee qayaamat maajraa kya hai Hamaare saamne pahloo men wo dushman ke baiThe hain Ye gustaakhee ye chheD achchhee naheen hai ai dil-e-naadaan Abhee phir rooth jaa.enge abhee to man ke baiThe hain Asar hai jazb-e-ulfat men to khinch kar aa hee jaa.enge Hamen parvaa naheen ham se agar wo tan ke baiThe hain Subuk ho jaa.enge gar jaa.enge wo bazm-e-dushman men Ki jab tak ghar men baiThe hain wo laakhon man ke baiThe hain Fusoon hai yaa duaa hai yaa muamma khul naheen saktaa Wo Kuch paDhte hue aage mire madfan ke baiThe hain Bahut royaa hoon main jab se ye main ne khvaab dekhaa hai Ki aap aansoo bahaate saamne dushman ke baiThe hain KhaDe hon zer-e-toobaa wo na dam lene ko dam bhar bhee Jo hasrat-mand tere saaya-e-daaman ke baiThe hain Talaash-e-manzil-e-maqsad kee gardish uTh naheen saktee Kamar khole hue raste men ham rahzan ke baiThe hain Ye josh-e-girya to dekho ki jab furqat men royaa hoon Dar o deevaar ik pal men mire madfan ke baiThe hain Nigaah-e-shokh o chashm-e-shauq men dar-parda chhantee hai Ki wo chilman men hain nazdeek ham chilman ke baiThe hain Ye uThnaa baiThnaa mahfil men un kaa rang laa.egaa Qayaamat ban ke uTThenge bhabookaa ban ke baiThe hain Kisee kee shaamat aa.egee kisee kee jaan jaa.egee Kisee kee taak men wo baam par ban-Than ke baiThe hain Qasam de kar unhen ye poochh lo tum rang-Dhang us ke Tumhaaree bazm men Kuch dost bhee dushman ke baiThe hain Koee chheenTaa paDe to 'daagh' kalkatte chale jaa.en Azeemaabaad men ham muntazir saavan ke baiThe hain