dil gaya tum ne liyaa ham kya karen
— Dagh Dehlvi
Dil gaya tum ne liyaa ham kya karen
Jaane vaalee chiiz kaa gham kya karen
Ham ne mar kar hijr men paa.ee shifaa
Aise achchhon kaa wo maatam kya karen
Apne hee gham se naheen miltee najaat
Is binaa par fikr-e-aalam kya karen
Ek saaghar par hai apnee zindagee
Rafta rafta is se bhee kam kya karen
Kar chuke sab apnee apnee hikmaten
Dam nikaltaa ho to hamdam kya karen
Dil ne seekhaa sheva-e-begaanagee
Aise naa-mahram ko mahram kya karen
Ma.arka hai aaj husn o ishq kaa
Dekhiye wo kya karen ham kya karen
Aa.eena hai aur wo hain dekhiye
Faisla donon ye baaham kya karen
Aadmee honaa bahut dushvaar hai
Phir farishte hirs-e-aadam kya karen
Tund-khoo hai kab sune wo dil kee baat
Aur bhee barham ko barham kya karen
Hyderabad aur langar yaad hai
Ab ke dillee men moharram kya karen
Kahte hain ahl-e-sifaarish mujh se 'daagh'
Teree qismat hai buree ham kya karen