dil ko kya ho gaya khuda jaane
— Dagh Dehlvi
Dil ko kya ho gaya khuda jaane
Kyuun hai aisa udaas kya jaane
Apne gham men bhee us ko sarfa hai
Na khilaa jaane wo na khaa jaane
Is tajaahul kaa kya Thikaanaa hai
Jaan kar jo na mudda.aa jaane
Kah diyaa main ne raaz-e-dil apna
Us ko tum jaano yaa khuda jaane
Kya gharaz kyuun idhar tavajjoh ho
Haal-e-dil aap kee balaa jaane
Jaante jaante hee jaanegaa
Mujh men kya hai abhee wo kya jaane
Kya ham us bad-gumaan se baat karen
Jo sataa.ish ko bhee gila jaane
Tum na paaoge saada-dil mujh saa
Jo taghaaful ko bhee hayaa jaane
Hai abas jurm-e-ishq par ilzaam
Jab khataa-vaar bhee khataa jaane
Naheen kotaah daaman-e-ummeed
Aage ab dast-e-naa-rasaa jaane
Jo ho achchhaa hazaar achchhon kaa
Vaa.iz us but ko too buraa jaane
Kee miree qadr misl-e-shaah-e-dakan
Kisee navvaab ne na raajaa ne
Us se uTThegee kya museebat-e-ishq
Ibtidaa ko jo intihaa jaane
'daagh' se kah do ab na ghabraao
Kaam apna bataa huaa jaane