dil pareshaan huaa jaataa hai

Dil pareshaan huaa jaataa hai Aur saamaan huaa jaataa hai Khidmat-e-peer-e-mughaan kar zaahid Too ab insaan huaa jaataa hai Maut se pahle mujhe qatl karo Us kaa ehsaan huaa jaataa hai Lazzat-e-ishq ilaahee miT jaa.e Dard armaan huaa jaataa hai Dam zaraa lo ki miraa dam tum par Abhee qurbaan huaa jaataa hai Girya kya zabt karoon ai naaseh Ashk paimaan huaa jaataa hai Bevafaa.ee se bhee rafta rafta Wo miree jaan huaa jaataa hai Arsa-e-hashr men wo aa pahunche Saaf maidaan huaa jaataa hai Madad ai himmat-e-dushvaar-pasand Kaam aasaan huaa jaataa hai Chhaa.ee jaatee hai ye vahshat kaisee Ghar bayaabaan huaa jaataa hai Shikva sun aankh milaa kar zaalim Kyuun pashemaan huaa jaataa hai Aatish-e-shauq bujhee jaatee hai Khaak armaan huaa jaataa hai Uzr jaane men na kar ai qaasid Too bhee naadaan huaa jaataa hai Muztarib kyuun na hon armaan dil men Qaid mehmaan huaa jaataa hai 'daagh' khaamosh na lag jaa.e nazar Sher deevaan huaa jaataa hai