gam se kahiin najaat mile chain paaen ham

Gham se kaheen najaat mile chain paa.en ham Dil Khoon men nahaa.e to gangaa nahaa.en ham Jannat men jaa.en ham ki jahannam men jaa.en ham Mil jaa.e to kaheen na kaheen tujh ko paa.en ham Jauf-e-falak men khaak bhee lazzat nahin rahi Jee chaahtaa hai teree jafaa.en uThaa.en ham Dar hai na bhuul jaa.e wo saffaak roz-e-hashr Dunya men likhte jaate hain apnee khataa.en ham Mumkin hai ye ki va.ade par apne wo aa bhee jaa.e Mushkil ye hai ki aap men us waqt aa.en ham Naaraaz ho khuda to karen bandagee se khush Maashooq rooth jaa.e to kyoonkar manaa.en ham Sar doston kaa kaaT ke rakhte hain saamne Ghairon se poochhte hain qasam kis kee khaa.en ham Kitnaa tiraa mizaaj khushaamad-pasand hai Kab tak karen khuda ke liye iltijaa.en ham Laalach abas hai dil kaa tumhen waqt-e-vaapseen Ye maal wo nahin ki jise chhoD jaa.en ham Saunpaa tumhen khuda ko chale ham to naa-muraad Kuch paDh ke bakhshnaa jo kabhi yaad aa.en ham Soz-e-daroon se apne sharar ban ga.e hain ashk Kyuun aah-e-sard ko na patinge lagaa.en ham Ye jaan tum na loge agar aap jaa.egee Us bevafaa kee khair kahaan tak manaa.en ham Ham-saa.e jaagte rahe naalon se raat bhar So.e hue naseeb ko kyoonkar jagaa.en ham Jalva dikhaa raha hai wo aa.eena-e-jamaal Aatee hai ham ko sharm ki kya munh dikhaa.en ham Maano kahaa jafaa na karo tum wafa ke ba.ad Aisa na ho ki pher len ulTee duaa.en ham Dushman se milte julte hain khaatir se dostee Kya faa.eda jo dost ko dushman banaa.en ham Too bhoolne kee chiiz nahin khuub yaad rakh Ai 'daagh' kis tarah tujhe dil se bhulaa.en ham