in aankhon ne kya kya tamaashaa na dekhaa

In aankhon ne kya kya tamaashaa na dekhaa Haqeeqat men jo dekhnaa tha na dekhaa Tujhe dekh kar wo duee uTh ga.ee hai Ki apna bhee saanee na dekhaa na dekhaa Un aankhon ke qurbaan jaaon jinhon ne Hazaaron hijaabon men parvaana dekhaa Na himmat na qismat na dil hai na aankhen Na DhoonDaa na paayaa na samjhaa na dekhaa Mareezaan-e-ulfat kee kya be-kasee hai Maseehaa ko bhee chaara-farmaa na dekhaa Bahut dard-mandon ko dekhaa hai too ne Ye siina ye dil ye kalejaa na dekhaa Wo kab dekh saktaa hai us kee tajallee Jis insaan ne apna hee jalvaa na dekhaa Bahut shor sunte the is anjuman kaa Yahaan aa ke jo kuch sunaa tha na dekhaa Safaa.ee hai baagh-e-mohabbat men aisi Ki baad-e-sabaa ne bhee tinkaa na dekhaa Use dekh kar aur ko phir jo dekhe Koi dekhne vaalaa aisa na dekhaa Wo tha jalva-aaraa magar too ne muusaa Na dekhaa na dekhaa na dekhaa na dekhaa Gaya kaarvaan chhoD kar mujh ko tanhaa Zaraa mere aane kaa rastaa na dekhaa Kahaan naqsh-e-avval kahaan naqsh-e-saanee Khuda kee khudaai men tujh saa na dekhaa Tiree yaad hai yaa hai teraa tasavvur Kabhi 'daagh' ko ham ne tanhaa na dekhaa