kaabe ki hai havas kabhi kuu e butaan ki hai

Kaabe kee hai havas kabhi koo-e-butaan kee hai Mujh ko khabar nahin miree miTTee kahaan kee hai Sun ke miraa fasaana unhen lutf aa gaya Suntaa hoon ab ki roz talab qissa-khvaan kee hai Paighaam-bar kee baat par aapas men ranj kya Meree zabaan kee hai na tumhaaree zabaan kee hai Kuch taazgee ho lazzat-e-aazaar ke liye Har dam mujhe talaash na.e aasmaan kee hai Jaan-bar bhee ho ga.e hain bahut mujh se neem-jaan Kya gham hai ai tabeeb jo puuree vahaan kee hai Hasrat baras rahi hai hamaare mazaar par Kahte hain sab ye qabr kisee naujavaan kee hai Waqt-e-khiraam-e-naaz dikhaa do judaa judaa Ye chaal hashr kee ye ravish aasmaan kee hai Fursat kahaan ki ham se kisee waqt too mile Din ghair kaa hai raat tire paasbaan kee hai Qaasid kee guftugoo se tasallee ho kis tarah Chhuptee nahin wo baat jo teree zabaan kee hai Jaur-e-raqeeb o zulm-e-falak kaa nahin khayaal Tashveesh ek khaatir-e-naa-mehrbaan kee hai Sun kar miraa fasaana-e-gham us ne ye kahaa Ho jaa.e jhuuT sach yahee khoobee bayaan kee hai Daaman sambhaal baandh kamar aasteen chaDhaa Khanjar nikaal dil men agar imtihaan kee hai Har har nafas men dil se nikalne lagaa ghubaar Kya jaane gard-e-raah ye kis kaarvaan kee hai Kyoonki na aate khuld se aadam zameen par Mauzoon vaheen wo khuub hai jo sunte jahaan kee hai Taqdeer se ye poochh raha hoon ki ishq men Tadbeer koi bhee sitam-e-naa-gahaan kee hai Urdu hai jis kaa naam hameen jaante hain 'daagh' Hindostaan men dhuum hamaaree zabaan kee hai