kaun saa taair e gum gashta use yaad aayaa

Kaun saa taa.ir-e-gum-gashta use yaad aayaa Dekhtaa bhaaltaa har shaakh ko sayyaad aayaa Mere qaaboo men na pahron dil-e-naashaad aayaa Wo miraa bhoolne vaalaa jo mujhe yaad aayaa Koi bhoolaa huaa andaaz-e-sitam yaad aayaa Ki tabassum tujhe zaalim dam-e-be-daad aayaa Laa.e hain log janaaze kee tarah mahshar men Kis museebat se tiraa kushta-e-bedaad aayaa Jazb-e-vahshat tire qurbaan tiraa kya kahnaa Khinch ke rag rag men mire nashtar-e-fassaad aayaa Us ke jalve ko gharaz kaun-o-makaan se kya thaa Daad lene ke liye husn-e-khuda-daad aayaa Bastiyon se yahee awaaz chalee aatee hai Jo kiyaa too ne wo aage tire farhaad aayaa Dil-e-veeraan se raqeebon ne muraaden paa.een Kaam kis kis ke miraa khirman-e-barbaad aayaa Ishq ke aate hee munh par mire phoolee hai basant Ho gaya zard ye shaagird jab ustaad aayaa Ho gaya farz mujhe shauq kaa daftar likhnaa Jab mire haath koi khaama-e-faulaad aayaa Iid hai qatl miraa ahl-e-tamaashaa ke liye Sab gale milne lage jab ki wo jallaad aayaa Chain karte hain vahaan ranj uThaane vaale Kaam uqbaa men hamaaraa dil-e-naashaad aayaa Dee shab-e-vasl mo.azzin ne azaan pichhlee raat Haa.e kam-bakht ko kis vaqt khuda yaad aayaa Mere naale ne sunaa.ee hai kharee kis kis ko Munh farishton pe ye gustaakh ye aazaad aayaa Gham-e-jaaved ne dee mujh ko mubaarakbaadee Jab sunaa ye ki unhen sheva-e-bedaad aayaa Main tamannaa-e-shahaadat kaa mazaa bhuul gaya Aaj is shauq se armaan se jallaad aayaa Shaadiyaana jo diyaa naala o shevan ne diyaa Jab mulaaqaat ko naashaad kee naashaad aayaa Leejiye suniye ab afsaana-e-furqat mujh se Aap ne yaad dilaayaa to mujhe yaad aayaa Aap kee bazm men sab kuchh hai magar 'daagh' nahin Ham ko wo khaana-kharaab aaj bahut yaad aayaa