le chalaa jaan mirii rooth ke jaanaa teraa

Le chalaa jaan miree rooth ke jaanaa teraa Aise aane se to behtar thaa na aanaa teraa Apne dil ko bhee bataa.oon na Thikaanaa teraa Sab ne jaanaa jo pataa ek ne jaanaa teraa Too jo ai zulf pareshaan raha kartee hai Kis ke ujDe hue dil men hai Thikaanaa teraa Aarzoo hee na rahi sub.h-e-vatan kee mujh ko Shaam-e-ghurbat hai ajab vaqt suhaanaa teraa Ye samajh kar tujhe ai maut lagaa rakkhaa hai Kaam aataa hai bure vaqt men aanaa teraa Ai dil-e-shefta men aag lagaane vaale Rang laayaa hai ye laakhe kaa jamaanaa teraa Too khuda to naheen ai naaseh-e-naadaan meraa Kya khataa kee jo kahaa main ne na maanaa teraa Ranj kya vasl-e-adoo kaa jo ta.alluq hee naheen Mujh ko vallaah hansaataa hai rulaanaa teraa Ka.aba o dair men yaa chashm-o-dil-e-aashiq men Inheen do-chaar gharon men hai Thikaanaa teraa Tark-e-aadat se mujhe niind naheen aane kee Kaheen neechaa na ho ai gor sirhaanaa teraa Main jo kahtaa hoon uThaa.e hain bahut ranj-e-firaaq Wo ye kahte hain baDaa dil hai tavaanaa teraa Bazm-e-dushman se tujhe kaun uThaa saktaa hai Ik qayaamat kaa uThaanaa hai uThaanaa teraa Apnee aankhon men abhee kaund ga.ee bijlee see Ham na samjhe ki ye aanaa hai ki jaanaa teraa Yuun to kya aa.egaa too fart-e-nazaakat se yahaan Sakht dushvaar hai dhoke men bhee aanaa teraa 'daagh' ko yuun wo miTaate hain ye farmaate hain Too badal Daal huaa naam puraanaa teraa