milaate ho usii ko khaak men jo dil se miltaa hai

Milaate ho usee ko khaak men jo dil se miltaa hai Miree jaan chaahne vaalaa baDee mushkil se miltaa hai Kaheen hai iid kee shaadee kaheen maatam hai maqtal men Koee qaatil se miltaa hai koee bismil se miltaa hai Pas-e-parda bhee lailaa haath rakh letee hai aankhon par Ghubaar-e-naa-tavaan-e-qais jab mahmil se miltaa hai Bhare hain tujh men wo laakhon hunar ai majma-e-khoobee Mulaaqaatee tiraa goyaa bharee mahfil se miltaa hai Mujhe aataa hai kya kya rashk vaqt-e-zab.h us se bhee Galaa jis dam lipaT kar khanjar-e-qaatil se miltaa hai Ba-zaahir baa-adab yuun hazrat-e-naaseh se miltaa hoon Mureed-e-khaas jaise murshid-e-kaamil se miltaa hai Misaal-e-ganj-e-qaaroon ahl-e-haajat se naheen chhuptaa Jo hota hai sakhee khud DhoonD kar saa.il se miltaa hai Javaab is baat kaa us shokh ko kya de sake koee Jo dil le kar kahe kam-bakht too kis dil se miltaa hai Chhupaa.e se koee chhuptee hai apne dil kee betaabee Ki har taar-e-nafas apna rag-e-bismil se miltaa hai Adam kee jo haqeeqat hai wo poochho ahl-e-hastee se Musaafir ko to manzil kaa pataa manzil se miltaa hai Ghazab hai 'daagh' ke dil se tumhaaraa dil naheen miltaa Tumhaaraa chaand saa chehra mah-e-kaamil se miltaa hai