mujh saa na de zamaane ko parvardigaar dil

Mujh saa na de zamaane ko parvardigaar dil Aashufta dil farefta dil be-qaraar dil Har baar maangtee hain nayaa chashm-e-yaar dil Ik dil ke kis tarah se banaa.oon hazaar dil Mash.hoor ho ga.ee hai ziyaarat shaheed kee Khoon-kushta aarzoo kaa banaa hai mazaar dil Ye said-gaah-e-ishq hai Thahraa.iye nigaah Sayyaad-e-muztarib se na hogaa shikaar dil Toofaan-e-nooh bhee ho to mil jaa.e khaak men Allaah re ghubaar tiraa pur ghubaar dil Poochhaa jo us ne taalib-e-roz-e-jazaa hai kaun Niklaa miree zabaan se be-ikhtiyaar dil Karte ho ahd-e-vasl to itnaa rahe khayaal Paimaan se ziyaada hai naa-paa.edaar dil Taaseer-e-ishq ye hai tire ahd-e-husn men MiTTee kaa bhee banaa.en to ho be-qaraar dil Us kee talaash hai ki nazar aa.e aarzoo Zaalim ne roz chaak kiye hain hazaar dil Aalam huaa tamaam raha us ko shauq-e-hoor Barsaa.e aasmaan se parvardigaar dil Pahle-pahal kee chaah kaa kiije na imtihaan Aanaa to siikh le abhee do-chaar baar dil Nikle miree baghal se wo aise taDap ke saath Yaad aa gaya mujhe vaheen be-ikhtiyaar dil Ai andaleeb tujh ko lage kab havaa-e-ishq Kaliyon kee tarah tujh men na phooTe hazaar dil Aashiq hue wo jaise adoo par ye haal hai Rakh kah ke haath dekhte hain baar baar dil Us ne kahaa hai sabr paDegaa raqeeb kaa Le aur be-qaraar huaa be-qaraar dil Betaab ho ke bazm se us kee uThaa diyaa Ghaafil main huun magar hai bahut hoshyaar dil Mash.hoor hain sikandar o jam kee nishaaniyaan Ai 'daagh' chhoD jaa.enge ham yaadgaar dil