mujhe ai ahl e kaaba yaad kya mai khaana aataa hai
— Dagh Dehlvi
Mujhe ai ahl-e-ka.aba yaad kya mai-khaana aataa hai
Udhar deevaana jaataa hai idhar mastaana aataa hai
Miree mizhgaan se aansoo pochhtaa hai kis liye naaseh
Tapak paDtaa hai khud jo is shajar men daana aataa hai
Ye aamad hai ki aafat hai nigah Kuch hai adaa Kuch hai
Ilaahee khair mujh se aashnaa begaana aataa hai
Dam-e-taqreer naale halq men chhuriyaan chubhote hain
Zabaan tak TukDe ho ho kar miraa afsaana aataa hai
Rukh-e-raushan ke aage sham.a rakh kar wo ye kahte hain
Udhar jaataa hai dekhen yaa idhar parvaana aataa hai
Jigar tak aate aate sau jagah girtaa huaa aayaa
Tiraa teer-e-nazar aataa hai yaa mastaana aataa hai
Vahee jhagDaa hai furqat kaa vahee qissa hai ulfat kaa
Tujhe ai 'daagh' koi aur bhee afsaana aataa hai