naa ravaa kahiye naa sazaa kahiye

Naa-ravaa kahiye naa-sazaa kahiye Kahiye kahiye mujhe buraa kahiye Tujh ko bad-ahd o bevafaa kahiye Aise jhooTe ko aur kya kahiye Dard dil kaa na kahiye yaa kahiye Jab wo poochhe mizaaj kya kahiye Phir na rukiye jo mudda.aa kahiye Ek ke ba.ad doosraa kahiye Aap ab meraa munh na khulvaa.en Ye na kahiye ki mudda.aa kahiye Wo mujhe qatl kar ke kahte hain Maantaa hee na tha ye kya kahiye Dil men rakhne kee baat hai gham-e-ishq Is ko hargiz na barmalaa kahiye Tujh ko achchhaa kahaa hai kis kis ne Kahne vaalon ko aur kya kahiye Wo bhee sun lenge ye kabhi na kabhi Haal-e-dil sab se jaa-ba-jaa kahiye Mujh ko kahiye buraa na ghair ke saath Jo ho kahnaa judaa judaa kahiye Intihaa ishq kee khuda jaane Dam-e-aakhir ko ibtidaa kahiye Mere matlab se kya gharaz matlab Aap apna to mudda.aa kahiye Aisi kashtee kaa Doobnaa achchhaa Ki jo dushman ko naakhudaa kahiye Sabr furqat men aa hee jaataa hai Par use der-aashnaa kahiye Aa ga.ee aap ko maseehaa.ee Marne vaalon ko marhabaa kahiye Aap kaa khair-khvaah mere sivaa Hai koi aur doosraa kahiye Haath rakh kar wo apne kaanon par Mujh se kahte hain maajraa kahiye Hosh jaate rahe raqeebon ke 'daagh' ko aur baa-wafa kahiye