raah par un ko lagaa laae to hain baaton men

Raah par un ko lagaa laa.e to hain baaton men Aur khul jaa.enge do chaar mulaaqaaton men Ye bhee tum jaante ho chand mulaaqaaton men Aazmaayaa hai tumhen ham ne ka.ee baaton men Ghair ke sar kee balaa.en jo nahin len zaalim Kya mire qatl ko bhee jaan nahin haathon men Abr-e-rahmat hee barastaa nazar aayaa zaahid Khaak uDtee kabhi dekhee na kharaabaaton men Yaarab us chaand ke TukDe ko kahaan se laa.oon Raushnee jis kee ho in taaron bharee raaton men Tumheen insaaf se ai hazrat naaseh kah do Lutf un baaton men aataa hai ki in baaton men DauD kar dast-e-duaa saath duaa ke jaate Haa.e paidaa na hue paanv mire haathon men Jalva-e-yaar se jab bazm men ghash aayaa hai To raqeebon ne sambhaalaa hai mujhe haathon men Aisee taqreer sunee thee na kabhi shokh-o-shareer Teree aankhon ke bhee fitne hain tiree baaton men Ham se inkaar huaa ghair se iqraar huaa Faisla khuub kiyaa aap ne do baaton men Haft aflaak hain lekin nahin khultaa ye hijaab Kaun saa dushman-e-ushshaaq hain in saaton men Aur sunte abhee rindon se janaab-e-vaa.iz Chal diye aap to do-chaar salaavaaton men Ham ne dekhaa unheen logon ko tiraa dam bharte Jin kee shohrat thee ye hargiz nahin in baaton men Bheje detaa hai unhen ishq mataa-e-dil-o-jaan Ek sarkaar luTee jaatee hai saughaaton men Dil Kuch aagaah to ho sheva-e-ayyaaree se Is liye aap ham aate hain tiree ghaaton men Vasl kaisaa wo kisee tarah bahalte hee na the Shaam se sub.h huee un kee mudaaraaton men Wo ga.e din jo rahe yaad buton kee ai 'daagh' Raat bhar ab to guzartee hai munaajaaton men