ranj ki jab guftuguu hone lagii
— Dagh Dehlvi
Ranj kee jab guftugoo hone lagee
Aap se tum tum se too hone lagee
Chaahiye paighaam-bar donon taraf
Lutf kya jab doo-ba-doo hone lagee
Meree rusvaa.ee kee naubat aa ga.ee
Un kee shohrat koo-ba-koo hone lagee
Hai tiree tasveer kitnee be-hijaab
Har kisee ke roo-ba-roo hone lagee
Ghair ke hote bhalaa ai shaam-e-vasl
Kyuun hamaare roo-ba-roo hone lagee
Naa-ummeedee baDh ga.ee hai is qadar
Aarzoo kee aarzoo hone lagee
Ab ke mil kar dekhiye kya rang ho
Phir hamaaree justujoo hone lagee
'daagh' itraa.e hue phirte hain aaj
Shaayad un kee aabroo hone lagee