saaf kab imtihaan lete hain
— Dagh Dehlvi
Saaf kab imtihaan lete hain
Wo to dam de ke jaan lete hain
Yuun hai manzoor khaana-veeraanee
Mol meraa makaan lete hain
Tum taghaaful karo raqeebon se
Jaanne vaale jaan lete hain
Phir na aanaa agar koee bheje
Naama-bar se zabaan lete hain
Ab bhee gir paD ke zof se naale
Saatvaan aasmaan lete hain
Tere khanjar se bhee to ai qaatil
Nok kee nau-javaan lete hain
Apne bismil kaa sar hai zaanoo par
Kis mohabbat se jaan lete hain
Ye sunaa hai mire liye talvaar
Ik mire mehrbaan lete hain
Ye na kah ham se tere munh men khaak
Is men teree zabaan lete hain
Kaun jaataa hai us galee men jise
Duur se paasbaan lete hain
Manzil-e-shauq tai naheen hotee
Thekiyaan naa-tavaan lete hain
Kar guzarte hain ho buree ki bhalee
Dil men jo Kuch wo Thaan lete hain
Wo jhagaDte hain jab raqeebon se
Biich men mujh ko saan lete hain
Zid har ik baat par naheen achchhee
Dost kee dost maan lete hain
Musta.id ho ke ye kaho to sahee
Aa.iye imtihaan lete hain
'daagh' bhee hai ajiib sehr-bayaan
Baat jis kee wo maan lete hain