sab log jidhar wo hain udhar dekh rahe hain

Sab log jidhar wo hain udhar dekh rahe hain Ham dekhne vaalon kee nazar dekh rahe hain Tevar tire ai rashk-e-qamar dekh rahe hain Ham shaam se aasaar-e-sahar dekh rahe hain Meraa dil-e-gum-gashta jo DhoonDaa nahin miltaa Wo apna dahan apnee kamar dekh rahe hain Koi to nikal aa.egaa sarbaaz-e-mohabbat Dil dekh rahe hain wo jigar dekh rahe hain Hai majma-e-aghyaar ki hangaama-e-mahshar Kya sair mire deeda-e-tar dekh rahe hain Ab ai nigah-e-shauq na rah jaa.e tamannaa Is vaqt udhar se wo idhar dekh rahe hain Har-chand ki har roz kee ranjish hai qayaamat Ham koi din us ko bhee magar dekh rahe hain Aamad hai kisee kee ki gaya koi idhar se Kyuun sab taraf-e-raahguzar dekh rahe hain Takraar tajallee ne tire jalve men kyuun kee Hairat-zada sab ahl-e-nazar dekh rahe hain Nairang hai ek ek tiraa diid ke qaabil Ham ai falak-e-shobada-gar dekh rahe hain Kab tak hai tumhaaraa sukhan-e-talkh gavaaraa Is zahr men kitnaa hai asar dekh rahe hain Kuch dekh rahe hain dil-e-bismil kaa taDapnaa Kuch ghaur se qaatil kaa hunar dekh rahe hain Ab tak to jo qismat ne dikhaayaa vahee dekhaa Aa.inda ho kya nafaa o zarar dekh rahe hain Pahle to sunaa karte the aashiq kee museebat Ab aankh se wo aaTh pahar dekh rahe hain Kyuun kufr hai deedaar-e-sanam hazrat-e-vaa.iz Allaah dikhaataa hai bashar dekh rahe hain Khat ghair kaa paDhte the jo Tokaa to wo bole Akhbaar kaa parcha hai khabar dekh rahe hain PaDh paDh ke wo dam karte hain Kuch haath par apne Hans hans ke mire zakhm-e-jigar dekh rahe hain Main 'daagh' hoon martaa hoon idhar dekhiye mujh ko Munh pher ke ye aap kidhar dekh rahe hain