sitam hi karnaa jafaa hi karnaa nigaah e ulfat kabhi na karnaa

Sitam hee karnaa jafaa hee karnaa nigaah-e-ulfat kabhee na karnaa Tumhen qasam hai hamaare sar kee hamaare haq men kamee na karnaa Hamaaree mayyat pe tum jo aanaa to chaar aansoo bahaa ke jaanaa Zaraa rahe paas-e-aabroo bhee kaheen hamaaree hansee na karnaa Kahaan kaa aanaa kahaan kaa jaanaa wo jaante hee naheen ye rasmen Vahaan hai va.ade kee bhee ye soorat kabhee to karnaa kabhee na karnaa Liye to chalte hain hazrat-e-dil tumhen bhee us anjuman men lekin Hamaare pahloo men baith kar tum hameen se pahloo-tahee na karnaa Naheen hai kuchh qatl un kaa aasaan ye sakht-jaan hain bure balaa ke Qazaa ko pahle shareek karnaa ye kaam apnee khushee na karnaa Halaak andaaz-e-vasl karnaa ki parda rah jaa.e kuchh hamaaraa Gham-e-judaa.ee men khaak kar ke kaheen adoo kee khushee na karnaa Miree to hai baat zahr un ko wo un ke matlab hee kee na kyuun ho Ki un se jo iltijaa se kahnaa ghazab hai un ko vahee na karnaa Huaa agar shauq aa.ine se to rukh rahe raastee kee jaanib Misaal-e-aariz safaa.ee rakhnaa ba-rang-e-kaakul kajee na karnaa Wo hee hamaaraa tareeq-e-ulfat ki dushmanon se bhee mil ke chalnaa Ye ek sheva tiraa sitamgar ki dost se dostee na karnaa Ham ek rasta galee kaa us kee dikhaa ke dil ko hue pashemaan Ye hazrat-e-khizr ko jataa do kisee kee tum rahbaree na karnaa Bayaan-e-dard-e-firaaq kaisaa ki hai vahaan apnee ye haqeeqat Jo baat karnee to naala karnaa naheen to wo bhee kabhee na karnaa Madaar hai naaseho tumheen par tamaam ab us kee munsifee kaa Zaraa to kahnaa khuda-lagee bhee faqat sukhan-parvaree na karnaa Buree hai ai 'daagh' raah-e-ulfat khuda na le jaa.e aise raste Jo apnee tum khair chaahte ho to bhuul kar dil-lagee na karnaa