tamaashaa e dair o haram dekhte hain

Tamaashaa-e-dair-o-haram dekhte hain Tujhe har bahaane se ham dekhte hain Hamaaree taraf ab wo kam dekhte hain Wo nazren naheen jin ko ham dekhte hain Zamaane ke kya kya sitam dekhte hain Hameen jaante hain jo ham dekhte hain Phire but-kade se to ai ahl-e-ka.aba Phir aa kar tumhaare qadam dekhte hain Hamen chashm-e-beenaa dikhaatee hai sab kuchh Wo andhe hain jo jaam-e-jam dekhte hain Na eemaa-e-khvaahish na iz.haar-e-matlab Mire munh ko ahl-e-karam dekhte hain Kabhee toDte hain wo khanjar ko apne Kabhee nabz-e-bismil men dam dekhte hain Ghaneemat hai chashm-e-taghaaful bhee un kee Bahut dekhte hain jo kam dekhte hain Gharaz kya ki samjhen mire khat kaa mazmoon Wo unvaan o tarz-e-raqam dekhte hain Salaamat rahe dil buraa hai ki achchhaa Hazaaron men ye ek dam dekhte hain Raha kaun mahfil men ab aane vaalaa Wo chaaron taraf dam-ba-dam dekhte hain Udhar sharm haa.il idhar khauf maane Na wo dekhte hain na ham dekhte hain Unhen kyuun na ho dilrubaa.ee se nafrat Ki har dil men wo gham alam dekhte hain Nigahbaan se bhee kya huee bad-gumaanee Ab us ko tire saath kam dekhte hain Hamen 'daagh' kya kam hai ye sarfaraazee Ki shaah-e-dakan ke qadam dekhte hain