tum aaiina hi na har baar dekhte jaao

Tum aa.eena hee na har baar dekhte jaao Miree taraf bhee to sarkaar dekhte jaao Na jaao haal-e-dil-e-zaar dekhte jaao Ki jee na chaahe to naa-chaar dekhte jaao Bahaar-e-umr men baagh-e-jahaan kee sair karo Khilaa huaa hai ye gulzaar dekhte jaao Yahee to chashm-e-haqeeqat nigar kaa surma hai Nizaa-e-kaafir-o-deen-daar dekhte jaao UThaao aankh na sharmaao ye to mahfil hai Ghazab se jaanib-e-aghyaar dekhte jaao Naheen hai jins-e-wafa kee tumhen jo qadr na ho Banenge kitne khareedaar dekhte jaao Tumhen gharaz jo karo rahm paa.emaalon par Tum apnee shokhee-e-raftaar dekhte jaao Qasam bhee khaa.ee thee qur.aan bhee uThaayaa thaa Phir aaj hai vahee inkaar dekhte jaao Ye shaamat aa.ee ki us kee galee men dil ne kahaa Khulaa hai rauzan-e-deevaar dekhte jaao Huaa hai kya abhee hangaama aur Kuch hogaa Fughaan men hashr ke aasaar dekhte jaao Shab-e-visaal adoo kee yahee nishaanee hai Nishaan-e-bosa-e-rukhsaar dekhte jaao Tumhaaree aankh mire dil se le sabab be-vaj.h Huee hai laDne ko tayyaar dekhte jaao Idhar ko aa hee ga.e ab to hazrat-e-zaahid Yaheen hai khaana-e-khummaar dekhte jaao Raqeeb barsar-e-parkhaash ham se hota hai BaDhegee muft men takraar dekhte jaao Naheen hain jurm-e-mohabbat men sab ke sab mulzim Khataa muaaf khataa-vaar dekhte jaao Dikhaa rahee hai tamaashaa falak kee nairangee Nayaa hai sho.abada har baar dekhte jaao Banaa diyaa miree chaahat ne ghairat-e-yoosuf Tum apnee garmee-e-baazaar dekhte jaao Na jaao band kiye aankh rah-ravaan-e-adam Idhar udhar bhee khabar-daar dekhte jaao Sunee-sunaa.ee pe hargiz kabhee amal na karo Hamaare haal ke akhbaar dekhte jaao Koee na koee har ik sher men hai baat zaroor Janaab-e-'daagh' ke ash.aar dekhte jaao