tumhaare khat men nayaa ik salaam kis kaa thaa

Tumhaare khat men nayaa ik salaam kis kaa thaa Na thaa raqeeb to aakhir wo naam kis kaa thaa Wo qatl kar ke mujhe har kisee se poochhte hain Ye kaam kis ne kiyaa hai ye kaam kis kaa thaa Wafa karenge nibaahenge baat maanenge Tumhen bhee yaad hai Kuch ye kalaam kis kaa thaa Raha na dil men wo bedard aur dard raha Muqeem kaun huaa hai maqaam kis kaa thaa Na poochh-gachh thee kisee kee vahaan na aav-bhagat Tumhaaree bazm men kal ehtimaam kis kaa thaa Tamaam bazm jise sun ke rah ga.ee mushtaaq Kaho wo tazkira-e-naa-tamaam kis kaa thaa Hamaare khat ke to purze kiye paDhaa bhee naheen Sunaa jo too ne ba-dil wo payaam kis kaa thaa UThaa.ee kyuun na qayaamat adoo ke kooche men Lihaaz aap ko vaqt-e-khiraam kis kaa thaa Guzar gaya wo zamaana kahoon to kis se kahoon Khayaal dil ko mire sub.h o shaam kis kaa thaa Hamen to hazrat-e-vaa.iz kee zid ne pilvaa.ee Yahaan iraada-e-sharb-e-mudaam kis kaa thaa Agarche dekhne vaale tire hazaaron the Tabaah-haal bahut zer-e-baam kis kaa thaa Wo kaun thaa ki tumhen jis ne bevafaa jaanaa Khayaal-e-khaam ye sauda-e-khaam kis kaa thaa Inheen sifaat se hota hai aadmee mash.hoor Jo lutf aam wo karte ye naam kis kaa thaa Har ik se kahte hain kya 'daagh' bevafaa niklaa Ye poochhe un se koee wo ghulaam kis kaa thaa